ADHD, ofvirkni, athyglisbrestur og skyldar raskanir

Í síðustu viku var ég á ráðstefnu í London um ADHD.  Þar komu fram margar áhugaverðar en jafnframt sláandi upplýsingar um áhrif þessarar skerðingar á einstaklinginn sem hana hefur og ekki síður þau miklu áhrif sem slík skerðing getur haft á fjölskyldu viðkomandi.  Í mörg ár hafa hinir ýmsu sérfræðingar rannsakað þessa skerðingu og ný þekking er stöðugt að bætast við.   Í ljós hefur komið að afleiðingar ADHD eru mun víðtækari en almennt hefur verið álitið.  Barn með ADHD á yfirleitt í erfiðleikum í skóla.  Það á erfitt með að ná því sem fram fer í skólastofunni, námsgögn eru oft í mikilli óreiðu, heimanám reynist erfitt og oft eru samskipti stirð við kennara, annað starfsfólk og samnemendur.  Vegna stöðugra mistaka í skóla er sjálfsmynd þessara barna léleg og þau hafa litla trú á sér varðandi allt sem lítur að skóla og skólagöngu.  Áhrif ADHD skerðingar er einnig mikil á fjölskyldur.  Meira er um skilnaði í slíkum fjölskyldum, þær eingangrast, tekjur verða lægri vegna þess að foreldrar geta oft  ekki unnið fullan vinnudag eða bætt við sig aukavinnu.  Þunglyndi er meira hjá foreldrum ADHD barna og aðstoð frá félagsþjónustu er oft lítil m.a. vegna skilgreiningar á skerðingunni.  ADHD einstaklingur dvelur oft mjög lengi í heimahúsum, stundum fram undir þrítugt,  þannig að ábyrgð foreldra og afskipti þeirra eru mun meiri en í öðrum fjölskyldum. Þeir bandarísku fyrirlesarar sem erindi fluttu á ráðstefnunni voru allir á einu máli um að lyfjagjöf væri forsenda fyrir betri árangri, en jafnframt þyrfti að koma til samtalsmeðferð og vel skipulagt skólaúrræði.  Fram kom hjá þeim að mun meiri hætta væri á að ADHD einstaklingur ánetjaðist fíkniefnum ef hann væri ekki á lyfjum.  Ástæðan væru sú að einstaklingur með rétta lyfjagjöf hefði mun betri stjórn á lífi sínu s.s. í skóla eða vinnu en sá sem ekki væri á lyfjum.  Afleiðingin væri betri sjálfsmynd og betri líðan.   ADHD samtökin á Íslandi studdu hina ýmsu aðila til þess að taka þátt í þessari ráðstefnu sem var frábært framtak.  Vonandi nýtist þekkingin til þess að bæta aðstæður þessa hóps.  Ég mun gera mitt til þess að svo megi verða.

Athugasemdir

[þórður (IP-tala skráð) 4.4.2007 kl. 14:12]

Þetta var athyglisverð grein.  Kom eitthvað fram um áhrif á systkini?  Ég hef á tilfinningunni að þau geti verið talsverð, annarsvegar vegna áreitis og afbrýðissemi af hálfu þess ofvirka og hins vegar vegna ónógrar athygli foreldra því öll þeirra orka og meira til fer í ofvirka barnið.´

 kv

Þórður

[Tómas Jónsson, 4.4.2007 kl. 15:45]

Sæll Þórður.  Mörg dæmi voru nefnd þar sem hinar ljúfustu fjölskyldustundir enduðu með ósköpum, hver í sínu horni í brjáluðu skapi. Bíltúrar, sumarbústaðaferðir og sumarfrí eru púðurtunnur í þessu samhengi.  Fram kom að oft sé besta ráðið að taka eitt og eitt barn í fjölskyldunni og sinna því sérstaklega, en líka ADHD barninu. Þannig fái allir sitt en ekki alltaf á sama tíma.