Spennustigið hækkar, Meistaramót GKG í golfi nálgast

Á morgun byrja ég í Meistaramóti GKG, en það er fjöugra daga keppni í höggleik.  Þetta er yfirleitt hápunktur golfvertíðarinnar a.m.k. hjá mér.  Þátttaka í þessu móti hefur undanfarin ár sett heimilislífið  á Álfhóli í upplausn.  Yfirleitt er árangurinn undir væntingum og kem ég því niðurbrotinn heim eftir hvern keppnisdag, staðráðinn í því að hætta í golfi og byrja að æfa skíðin aftur.  Félagsráðgjafarkunnátta konu minnar dugar lítið til þess að ná upp sjálfstraustinu, þannig að í ár var ákveðið að hún hyrfi af landi brott.  Hún er því þessa vikuna í Cannes í Frakklandi með vinkonu sinni Guðrúnu Narfadóttur.  Í staðinn stunda ég sálfræðilega íhugun og hugræna atferlismeðferð, þar sem ég sé fyrir mér hvert högg á vellinum og viðbrögð mín við þeim.  Það á svo eftir að koma í ljós hvort  þessi ráðstöfun skilar árangri. Svona getur lífið verið flókið og erfitt.  

Ég er samt vel undirbúinn eins og alltaf og væntingar hóflegar.  Góð ráð þegin. 

Athugasemdir

[Snjólaug (IP-tala skráð) 10.7.2007 kl. 11:58]

Minnist þess að hér í gamla daga þegar ég var að læra að synda hjá þér að þá fékk maður alltaf prins póló og ískalda kókómjólk eftir erfiðan dag - spurning hvort það sé ekki heppilegra en allt þetta fræðirugl

Gangi þér vel gamli.

Biggýs hefur fulla trú á þér

Kv. Spilandi þjálfari Biggýs með meiru

[Tómas Jónsson, 10.7.2007 kl. 12:52]

Góð athugasemd Snjólaug ég fer í Prins Pólóið.  Ég minnist þess þegar þú nefnir Prinsið að eitt sinn komu Vikingar til Sigulufjarðar að spila fótbolta í 5. flokki.  Þegar staðan var 5-0 fyrir Víkingum í fyrri hálfleik, þá kallaði einhver áhorfandinn,"Áfram KS, þessir Reykvíkingar eru aldir upp á kók og prins póló og geta ekki neitt" Ég dauðöfundaði þá af þessu fæði þeirra, en það skilaði greinilega árangri svo ég prófa prins póló og kók.   Takk.

[Kristín Tómasdóttir (IP-tala skráð) 10.7.2007 kl. 19:33]

Ég ætla rétt að vona að það verði líft á Álfhóli í vikunni þar sem við Gassi munum flytja tímabundið inn. Stöðugt geðslag mitt og hagfræðikunnátta Garðars getur þó kannski hjálpað þér ef á reynir. 

[Sóley Tómasdóttir (IP-tala skráð) 10.7.2007 kl. 19:53]

Tja - mér finnst ágætt að vera bara í Hollandi núna, þó mitt geðslag sé venju fremur stöðugt. Það væri heldur betur sorglegt ef þú klúðraðir mótinu pabbi. Fáðu þér kók og prins og massað'issa kalla!

[þóra (IP-tala skráð) 11.7.2007 kl. 12:09]

nú ef sjálfstraustið fer eitthvað að minnka, hugsaðu þá til hárvaranna sem þú vannst einhverntíma í golfmóti. Já og tennissokkanna sem stóð "Flúðir" á. það ætti að slá á helstu minnimáttarkenndina og vekja upp meira drápseðli.